Esta curuxa de la semeya fízonos una visita'l pasáu vienres 13 de payares. La curuxa, que ye un páxaru de presa nocherniegu que vive n'edificios vieyos ya ilesies, debió entrar a la gueta de dalgún mur o d'un sitiu afayadizu p'agospiar o bien dambes coses. El casu ye que la probina llevó un sustu grandísimu cuando Elena, la conserxe nueva, atopóla nun cuartín durmiendo. Anque de xuru que' l sustu foi mutuu.
Les curuxes son mui conocíes polos habitantes de los pueblos asturianos al ser protagonistes d'abondoses creencies como la que diz que la curuxa canta y bufa cuando siente la muerte cerca y que si se posa o ronda la casa d’un enfermu, significa qu'esti va morrer. En dellos pueblos del centru y oriente asturianos creyen que ye una de les figuraciones de la Guaxa y tamién suelen rellacionala coles bruxes y les artes máxiques. Dizse que: “la curuxa ye de los páxaros la bruxa”, y “bien sabe entender la bruxa'l cantar de la curuxa”. Dalgunos aseguren que “una bruxa nun ye auténtica si nun tien una curuxa”.
Por embargu, munches persones creyen que les curuxes son el símbolu de la bona suerte, la felicidá y la sabiduría.